ഉയർത്തെഴുന്നേല്പ്

ഉയർത്തെഴുന്നേല്പ് 

ഹേ ത്യാഗിവര്യാ, മനുഷ്യപുത്രാ

നീ ഇനിയും ഉയർത്തെഴുന്നേല്ക്കരുത്

നിൻ ശവക്കല്ലറയ്ക്ക് ചുറ്റും

പീരങ്കികളുമായി നിൻ ശിഷ്യർ കാത്തിരിക്കുന്നു;

യുഗങ്ങളായി ശാസ്ത്രം  പെറ്റ

അണുവായുധങ്ങൾ

നിനക്കായി ഒരുക്കുന്നു.

വെള്ളരിപ്രാവുകളുടെ പച്ചമാംസം

നിനക്കായ് വിളമ്പുന്നു

മറിയത്തിന്റെ നെഞ്ച് പങ്കുവയ്ക്കാൻ

നിന്റെ വരവും കാത്തിരിക്കുന്നു

നിന്നെ ഒറ്റിക്കൊടുക്കാൻ

മുപ്പത് രാജ്യങ്ങൾ എണ്ണിക്കഴിഞ്ഞു

നിന്റെ വിചാരണയ്ക്കായി

അന്യ ഗ്രഹങ്ങളിലും

ബലിക്കല്ലുകൾ ഒരുക്കുന്നു;

നീ ഇനിയും ഉയർത്തെഴുന്നേല്ക്കരുത്

നിനക്ക് മുൻപേ നിൻ ശിഷ്യർ

ഉയർത്തെഴുന്നേറ്റിരിക്കുന്നു

അപ്പം വർഷിച്ച നിന്റെ കൈകൾ

ഇന്നു തൊക്കുകൾ വർഷിക്കുന്നു

വെള്ളം വീഞാക്കിയ നിൻ മനുഷ്യ ശക്തി

വെള്ളം ചോരയാക്കുന്നു

നിൻ കുരിശിനിരുവശത്തൂമായി

ഗാന്ധിജിയും ലിങ്കനും

മരക്കുരിശിൽ പിടയുന്നു

നിന്റെ അവതാനങ`ങൾ വാഴ്ത്തുന്ന

ശിരസുകൾ തറയിൽ വീണുരുളുന്നു

വേണ്ട, ഇനിയെങ്കിലും നീ

ഉയർത്തെഴുന്നേല്ക്കരുത്

നിൻ ചുണ്ടിൽ വിരിയുമീ പുഞ്ചിരിയും

കണ്ണിൽ തെളിയുമീ കാരുണ്ണിയവും

ഇനിയും ജീവിക്കട്ടെ